【Viu】1月21号就系Edan吕爵安嘅28岁牛一，㖊日佢获海外后援会联合搞咗个生日会应援，举行咗两场「Stars Light Up the Edanverse」Party，爵屎们更请嚟「正印」小仪做MC，巧有心！Edan同爵屎大玩游戏、切蛋糕，海外后援会仲预备个惊喜，集合咗香港同埋海外嘅爵屎祝福影片，令寿星仔劲感动！今年成为唱作歌手嘅Edan，又获赠家用专业录音咪，爵屎希望佢可以创作更加多好嘅作品。宠粉嘅Edan即席开IG live，俾无法出席嘅香港与海外爵屎一齐参与其中。
席间，寿星仔又向爵屎真情剖白，感慨指27岁嘅自己经历咗好特别嘅一年，「自己多咗好多唔同嘅经历，有好多唔同嘅感受，大家见到有啲事情，大家见唔到嘅，我都发生好多唔同嘅事情，的确有好多以往未体验过嘅感觉，或者有好多唔同嘅情绪。个天系咪玩我？Keep住发生好多控制唔到，匪夷所思嘅事。」佢笑指可能俾人落降头，「我都有怀疑过，身边嘅朋友话你呢排风水真系好差，真系搲晒头，点啊？各方面一路发生好多事情。」佢续指27岁对自己嚟讲系转变嘅一年，认清更多嘢嘅一年，「以往嘅自己可能有啲天真同幼稚，唔够成熟，有啲嘢可能谂得太简单，呢一年系有机会审视自己嘅不足，我形容为有一种变化嘅感觉，可能28岁嘅Edan会系新嘅出发或者转变。」Edan又多谢爵屎们一路以嚟都比力量、勇气同埋动力佢，希望继续同大家一齐去探险、探索！
最后，Edan绕场一周同爵屎们近距离接触，一齐大合唱《My Apple Pie》，现场充满住浓浓嘅爱！小编都预祝Edan生日快乐！