【Viu】贺岁片《临时决斗》今日喺澳门举行全球首映礼，其中5位演员古天乐、Gigi梁咏琪、Louise王丹妮、Peter陈湛文、陈慧敏出席，台湾男神王大陆亦专登嚟撑场！古天乐同Gigi指期待同观众一齐入戏院睇新戏，又预告嚟紧已经安排咗连场谢票，谂定好新嘅谢票方式，想知系咩？古天乐就大卖关子啦，莫非会着套财神爷装出嚟？
古天乐有名叫做「Mr. Cool」，但就被Gigi爆佢对住鱼蛋妹父爱满泻，唔知Mr. Cool对住小朋友会有咩招数？讲讲吓，古天乐笑爆指身边有小朋友嘅亲戚都好「黑心」，同佢见面前会畀小朋友睇《阴阳路》，搞到小朋友劲惊佢：「畀佢睇《明日战记》唔得㗎咩？」咁好笑得唔得㗎？
提到古天乐喺戏中有场生挞Louise嘅戏码，佢话事前有同武指夹过可以点样卸力，要就力就好难啦，而当时喺现场嘅Gigi话睇到呆晒，大赞两位超专业！另一当事人Louise指被挞完𠮶个moment系feel到五脏六腑都震散晒，爬返起身都需时，咁坚系好激㖞！
Peter相对嚟讲就比较舒服又幸福，有两位女神Louise、周秀娜垂涎佢嘅美色，究竟佢系点「贿赂」导演？有冇亲热镜头？Louise再爆Peter同娜姐影道具相时超close，Peter笑话当时系硬晒⋯軚㗎！
另外，今届金像奖开始接受报名，古天乐以《九龙城寨之围城》报男配角，有指系想造就林峰攞影帝，对此古天乐亦直认不讳，表明系佢自己嘅意思，同好想林峰称帝！同时《城寨》喺亚洲电影大奖获9项提名，古天乐指系好鼓舞，睇好伍允龙攞男配角奖！再讲到现时香港电影业好难开戏，需要政府资助，古天乐又点睇呢？有足本访问片啦！