【Now.com】Adobe 宣布即将喺 Photoshop 推出一项名为「即时协同编辑」嘅新功能，畀多个用户同时检视、编辑同一文件。呢个概念类似大家一齐处理 Google Doc、Sheet，只系Photoshop呢个platform就用喺照片或图形编辑。
小编睇到呢个新功能消息，即刻觉得好啱自己工作用！Designers或者时下新闻网编，经常要自己整埋图砌埋 Thumbnails 出 post，有时斋靠从旁讲解指导同事，不及直接落手制作示范更有效，不过下下要走去同事座位示范，唔符合现今跨地域数码世界潮流。
根据 Adobe 嘅新闻稿，「即时协同编辑」可应用到多种情境。例如，当设计团队需要同时处理一个包含多个 elements 嘅大型项目时，呢个功能特别有用。另外，亦可以用喺老师向学生讲解特定操作流程，或者喺会上向客户demo内容编辑详情。
要用呢个功能，文件档案要储存至 Creative Cloud。如果档案仲储存喺电脑，Photoshop 会教 users 将 file上传至云端，完成后会生成 .PSDL 格式文件，而唔系传统嘅 .PSD 格式。
新功能下星期会以私人测试版形式推出，Adobe未公布几时全面开放畀所有用户。参与测试嘅用户需要注册并通过核准，先可以透过现有嘅共享按钮启用呢个功能。推出初期，「即时协同编辑」将适用喺 Photoshop 嘅桌面版及网页版，不排除未来再扩展到手机版。
Photo / Adobe