【Viu】乐队Dear Jane与台湾组合五坚情，呢晚合体喺亚博开骚，最后firm咗「坚珍情」做限定组合名，唔知佢哋之后会唔会真系用呢个名出歌呢？去到音乐会最后两首歌，喺患感冒嘅邱锋泽提议下，9位仔仔集体除衫，麒麟臂放题，睇到全场fans㷫烚烚，呢个画面坚系养眼！之后佢哋仲当咗个Y台做T台，即场嚟咗场猛男show！
show后「亲爱的珍」搞笑话当刻见到五坚情个个都有老鼠仔，除完𠮶吓都想即刻着返，下次battle肌肉冇有得谂？佢哋又讲话呢次同五坚情合作觉得好有趣，只系喺语言上有少少障碍啫，不过Tim就被其他兄弟赞佢系沟通担当，喺呢个moment，Tim就自爆其实佢一直都听唔明，咁funny？为咗改善同五坚情嘅沟通，专登请嚟「社工E」Edan帮手，佢哋又觉得有冇帮助先？
五坚情再次同Edan合作都好开心，其中锋泽指好感动，事关合唱《一表人才》次数一只手嘅手指数得晒，都想有多啲表演机会！五子大赞香港嘅坚果超热情，心郁郁之后喺亚博开骚！讲返第一次见Dear Jane嘅感受，小赖竟然话觉得某成员个样好恶，究竟系边个？之后仲逼埋其他兄弟一齐答，场面爆笑！
娄峻硕刚新婚，咁啱好友Tyson Yoshi亦筹备紧婚礼，有同Tyson交流吓心得？会唔会跟Tyson出露半球mouse pad？可以做埋回礼礼物？提到有坚果指骚前取消咗观赏彩排环节而唔开心，五子又点回应？
另外，Tim老婆杨洛婷丁父忧，Tim指外父曾换过多次器官，身体唔系好强壮，喺叱咤颁奖礼请大家集气后曾有好转，但翌日突然再恶化，总算走得舒服。Tim又指太太受到好大打击好唔开心，所以会尽快飞去加拿大陪伴佢。