【Viu】由Dicky张衞健、许志安、阿公苏永康同埋Edmond梁汉文组成嘅BIG FOUR，相隔12年合体再踏红馆舞台，台前幕后阵容强劲，演唱会海报更重金礼聘鬼才Jan林海峰担任创意大脑，星级摄影师夏永康亲自操刀添！Dicky爆料「BIG FOUR」由Jan命名，「我哋第一张演唱会海报，4个人咬住一支玫瑰花𠮶张，就系由Jan帮我哋做。好开心今次我哋三顾草庐，邀请到佢出山。」Jan幽默回应：「𠮶次演唱会喺2010年，即系隔咗15年先至有第二个job，都算系咁，我都终于发市！」

今次演唱会「HAPPY TO SEE YOU ALL 」再由Jan命名，佢搞笑话原来想用「BIG FOUR无穿无烂演唱会」，但又觉得中文名唔适合，「不如谂个英文名，就叫『BIG FOUR BODY CHECK演唱会』，每次上台都系你哋同观众嘅一次体检！」Dicky补充：「唔骚唔知身体好！」Edmond则称：「BIG FOUR系我哋嘅『根』，咁耐无见，梗系要一齐搞啲正嘢畀大家啦！」

而BIG FOUR嘅「时装担当」阿公，被Jan问到今次四子造型，身形发福嘅佢话困难喺自己度，「好开心又再同大家衬衫衬饰物，但我而家嘅size俾唔到佢哋用，除咗啲披肩围巾之外。Jan笑指安仔低胸上阵，安仔即掩住心口，拉开话题：「虽然我哋也成日见面，但一齐喺舞台上出现，真系好耐无感受到，直到今日一齐影海报，感觉到个力量返嚟啦！」

喺海报拍摄期间，现场播放多首有关友情嘅歌曲，Jan指最初拣咗《监狱风云》首歌《友谊之光》为BIG FOUR带入情绪，「佢哋四个好快就好自然咁入咗𠮶个氛围，呢个就系大家都好想喺台上见到佢哋俾大家嘅感觉。尤其是Dicky，佢好清楚我想大家表达乜嘢，一直带住大家，始终都系最大。」Dicky一脸认真，扮作有感而发，「长辈嘛，『牵牛上树』系有啲难度，仲要系三只牛，但系佢哋都算乖、听话！」Jan以醇酒形容四位嘅友谊同情怀。