【Viu】古天乐㖊日喺澳门出席完电影首映礼，今日又嚟到沙田马场出席活动，同场仲有嚟表演嘅Gin Lee李幸倪，同埋一班型男包括朱鉴然、马志威、范麒智以及冯允谦孖生细佬冯重谦等等！
古仔受访时话配合今日主题绅士风，所以特登著蓝色西装加煲呔，原来以前钟意玩玩具嘅古仔，而家唯一兴趣系买衫，尤其出埠做嘢会睇吓当地设计，疫情时上网买衫试过买错童装，最后唯有转赠俾小朋友亲戚啰！古仔话平时都有同朋友细细地夹份买吓马，赢咗最多食餐饭，会唔会谂吓买只靓马做马主？古仔话冇谂过，觉得养宠物最好喺身边，但又无可能养只马喺身边，佢都系钟意小动物多啲！
讲到之前喺大陆被问到会唔会开演唱会，佢即刻话唔会。有冇留意黄百鸣开YT Channel唱歌？古仔话冇睇Channel但平时有听百鸣哥唱歌，仲赞佢唱得几好，直情可以开演唱会，自己冇佢唱得咁好添㖞！嚟紧农历新年，古仔都系留喺香港陪屋企人，休息同拜年咁啦！
至于Gin Lee就透露嚟紧会出碟，年尾会开骚，新一年想玩多啲，同多啲唔同嘅音乐人或者唔同界别crossover，未合作过嘅都想合作，例如轩公啦！农历年佢会同家人去旅行，快闪台湾睇A Lin演唱会，趁机休息，以应付今年密集嘅工作！讲到同公司嘅谢霆锋开演唱会，Gin Lee都话收到好多扑飞电话，连好多好耐无见嘅朋友都嚟问，但佢嘅回复系有啲困难、都几爆，仲叫大家唔好再揾佢，度闸落得好紧呀！快啲睇足本访问啦！