【Viu】MC张天赋正喺澳门举行总共5场、横跨两个周末嘅《This is MC 2 LIVE IN MACAU》跨年演唱会！㖊晚2024最后一日，首次同「赋二代」倒数嘅MC显得份外兴奋又紧张，即场加码送新年大礼，除咗额外唱多3首歌《干》、《最低保障》、《Good Time》之外，仲首唱元旦新歌《说谎者》畀赋二代听添，喺现场嘅赋二代坚系超幸福！而对《说谎者》因早前系统出错，意外提早放上某音乐串流平台，MC鬼马笑斥新歌偷走出嚟「好曳」！
紧张进入戏肉倒数环节，当大萤幕突然出现倒数数字𠮶阵，有赋二代突然起哄大叫：「除衫！」MC搞笑许下新年愿望：「我拍完戏之后应承自己，一定要有八嚿？唔系八嚿，六嚿啦！呀⋯⋯四嚿腹肌喇！我一定要2025年骚一次畀大家睇，仲有强而有力嘅臂弯⋯⋯除衫唔系今日，今次系我第一次同五千人倒数！」有片有证据，就睇吓MC几时「找数」啦！
MC喺台上出尽二百分努力演出，状态大勇，但原来佢打从前日29号演唱会，身体已开始出状况，令佢史无前例咁惊！MC自爆未试过听嘢完全分唔到任何音，形容就好似揸车睇唔到路咁，超级惊！所以佢特别多谢赋二代每一位嘅掌声：「不论系我一上一落、每首歌起奏完结，大家都畀鼓励我，但祸不单行，我㖊日早上开始feel到我扁桃好痛，发炎食咗药，不过都证明咗我病都唱到歌！」最后MC亦希望大家将所有唔开心都留喺2024，开心迎接全新一年！同时希望MC快啲好返，继续唱好歌！