【Viu】Sammi郑秀文嘅澳门演唱会㖊晚嚟到第五场，请到Louise王丹妮做嘉宾。当年Louise演出电影《梅艳芳》，获得Sammi支持同鼓励因而结缘。Louise感恩Sammi提拔，表示之前试过喺电影中登台唱歌，今次以个人身份踏上舞台同Sammi合唱，心情无比兴奋。佢又认为同Sammi一齐唱梅姐嘅《坏女孩》别有意义，「深深感受到我哋对梅姐嘅敬爱之情！」

除咗同Sammi合唱《坏女孩》之外，Louise亦独唱Sammi嘅作品《理想对象》，「呢首歌系我亲自拣嘅，因为除咗我之外，我知道好多歌迷都视Sammi为理想对象，所以我唱出大家嘅心声。」为咗今次表演，Louise专诚揾唱歌老师练歌，仲不时提醒自己，表演嘅时候唔好太紧张，尽情同Sammi一齐享受舞台。令Louise最难忘嘅系，Sammi竟然从百忙中抽空同佢排练，「呢种精神真系好值得学习，respect！我希望除咗舞台表演外，将来可以有机会跟Sammi一齐拍电影。」

表演完毕后，Sammi大赞Louise表现淡定，而且好有台型，令Louise开心不已，仲告知Sammi，除咗佢之外，老公罗孝勇、囡囡，长居澳洲嘅老爷奶奶都有同行，皆因全家都系Sammi嘅忠实Fans！