【Viu】合共五场、横跨两个周末嘅《This is MC 2 LIVE IN MACAU》演唱会，原定今晚举行尾场，但由于MC张天赋完成倒数场后患上重感冒，㖊晚完骚后仲体力不支，要由工作人员搀扶返回酒店休息，大会刚才宣布原定今晚举行嘅尾场要忍痛取消，事关医生建议MC彻底休息，将延期举行。
MC刚才彩排后戴上口罩现身场外，向一众「赋二代」致歉，佢气若游丝咁话多次尝试想顶硬上开骚，但最终顶唔住：「因为每次唞气都好痛……个肺！」一班歌迷心痛之余，都不断叫MC加油，亦高呼：「等你呀！」希望MC听到可以释怀啦！
其实患上重感冒嘅MC，㖊日彩排时已不断流鼻水，食咗药顶硬上表演，尾二场喺台上亦不时同观众致歉，自觉冇尽歌手嘅责任，保持身体健康。虽然演唱水准冇受病情影响，但就取消咗唱《时候不早》时嘅落台握手环节。
及至唱完最后一首歌《世一》后，MC终于松一口气话：「 必须再多谢每位入场观众！几辛苦都好，终于挨到呢度！今朝3点几醒咗，我好耐好耐未试过咁唔舒服，必须再一次提醒大家，小心身体，保重身体！再次多谢每一位入场观众嘅支持，令我挨到呀！原来有嘢唔得都可以变得，多谢你哋！多谢大家畀咗一个『世一』嘅晚上畀我！」其后MC喺社交网站慨叹：「世纪！系世纪最病嘅一次！」祝MC早日康复啦！