【Viu】舞台剧《SUCK乐园》㖊晚喺演艺学院圆满落幕。Ivana王菀之、AK@MIRROR、Rosa韦罗莎、白只、阿卵杨伟伦同埋童童蔡晓童连同一众幕后人员谢幕，现场掌声如雷。圈中朋友陈凯咏、陈颖欣同埋MIRROR嘅Jeremy同Tiger都有捧场。

「小电兔」AK获编剧兼导演阮韵珊点名赞赏，指佢即使肠胃不适，仍坚持投入彩排，非常敬业！对于演出结束，AK表现得依依不舍，「感觉一切发生得好快，由排练到完骚好似眨吓眼就过咗一样。好衷心多谢大家俾我参与呢段旅程，作为舞台剧初哥，呢班对手真系好锡我、好有爱，多谢大家！」佢表示最钟意「巴胶」呢个角色，因为可以俾佢尽情释放内心嘅小邪念，AK又希望未来有机会再演舞台剧，更想挑战一啲只演一个角色嘅作品。而被观众大赞演技进步嘅童童则谦虚回应：「大家太过奖啦，最紧要系大家睇得开心！」并笑言演舞台剧就好似细个喺公园玩捉迷藏：「要凑够人一齐玩系唔容易，好开心今次呢班人陪我玩咗一场咁开心嘅Game！」

Ivana笑指自己「长大了」，回想起廿几年前初接触舞台剧时，每次演出结束都会激动落泪，家阵就学识将不舍转化成美丽回忆。白只则指今次同Ivana有大量对手戏，又希望未来再有合作机会，Ivana搞笑话同白只之间「好似一齐成长，但又一齐多咗啲年纪。」又打趣话：「唔想讲个『老』字啦，我哋以前系演妹猪，而家已经要做人哋爸爸妈妈喇！」

至于同阿卵合作无间嘅Rosa，笑指对方每一场戏都令佢印象深刻。而阿卵坦言最不舍得嘅系剧中嘅吉祥物造型「笑笑兔」，甚至谂过将戏服带返屋企珍藏添！