【Viu】林峰一连七场红馆骚《GO WITH THE FLOW 林峰演唱会》去到第3同第4场，阿峰继续劲歌热舞、大唱经典歌之外，仲分别邀得Dear Jane、MC张天赋做嘉宾！

前晚第3场，阿峰唱出由Dear Jane结他手Howie作曲嘅《楼下有人》，Dear Jane四子突然升上台，造就主音Tim同阿峰惊喜合唱！阿峰话佢哋同一间唱片公司之外，早喺2021年前就合演剧集 《天涯侠医》，舞台上嘅mon亦出现剧照，成为焦点！Tim当时演阿峰好友，可惜当时佢系零对白。阿峰望完阿Tim当年嘅样就忍唔住问：「你点解越嚟越后生嘅呢？」佢又话：「我角色同你系Friend，但你点解唔揾我做主诊医生？所以咪走咗啰。」之后Dear Jane唱出《你流泪所以我流泪》，现场气氛keep住高涨！

到㖊晚第4场开骚前嘅晏昼，《九龙城寨之围城》「秋哥」任贤齐百忙之中抽空探阿峰班，好有心！到夜晚开骚，阿峰同嘉宾MC张天赋合唱完《驯兽师之王》之后，MC就话佢同阿峰都系射手座，话自己就系早一个星期，阿峰回应：「即系你大我一个礼拜。」讲到「跪凳」，阿峰即兴教MC跳「椅子舞」，自称「华纳舞王」嘅MC只好临场献技，阿峰就建议将来要同MC合作跳唱歌，相信Fans们会好期待！MC喺跳完舞后就独享舞台，唱出《怀疑人生》！

而向来宠粉嘅阿峰，喺每晚完骚后都会去到红馆场外向粉丝们大派福利，仲为幸运粉丝送签名，全力满足大家！