【Viu】林峰一连七场红馆个唱今晚嚟到第5场，小编同网友最期待嘅画面终于出现喇！林峰邀得老拍档钟嘉欣任嘉宾，促成「世纪CP」管家仔程亮同常在心相隔十几年后再度同台演出，二人先合唱《驯兽师之王》，嘉欣一升上台已经感动掩面，「露营必须酒」后，林峰即程亮上身话：「没有常在心的7千9百天！」嘉欣终于忍唔住爆喊，阿峰马上冲去台边拎纸巾帮嘉欣抹眼泪。当嘉欣高呼同阿峰已经十几年冇见面，仲话当年22岁识佢𠮶阵，已经知道阿峰系Super Star，搞到阿峰都差啲忍唔住喊，场面感人！

其后二人冧爆合唱半首经典剧集歌曲《心领》，回忆杀满满，令全场观众疯狂尖叫！嘉欣仲话希望可以有机会喺红馆开骚，仲勾手指尾约定阿峰做嘉宾，当阿峰落台换衫时，嘉欣即「常在心」Mode大赞阿峰嘅笑容由始至终都咁冧，好「Alfred（程亮英文名）」咁话！

世纪合体过后，阿峰换上银色造型唱出一系列剧集金曲，仲行匀四面台同观众握手，十足万人唱K大会呀！此外，姜大卫、李琳琳、连炎辉、胡枫、余香凝、周家蔚、文颂娴、梁靖琪、谢天华同太太都有捧场！快啲睇现场实况啦！