行政长官岑浩辉近日发布任内首份施政报告。对于本年度施政报告内容，市民有何观感、是满意或失落？本媒记者在本（4）月16日在氹仔与市民聊聊对这份施政报告想法。

有市民关注本地物价过高，而长者福利增幅不大，有部分生活依然困难；有市民指育儿津贴对有生育打算的家庭而言「有惊喜」，是笔不少的补贴，但育儿鼓励措施力度未大到愿意再生多个小朋友；亦有市民指对比邻近地区，养老金仍是过低。

氹仔居民：物价贵、养老金加得几蚊
享受返澳门人福利系应该

已退休的氹仔居民文女士对于本年度施政报告不是太关心，「唔系好识，只有略略睇下，哦，原来有一万㖞、加咗养老金一千㖞，就系咁。印象就系加咗钱，」对长者福利提升有印象，但实际加幅不大。

「养老金增加咪得𠮶几蚊，加得唔多，冇咩作为。……𠮶两三千蚊冇咩用㗎，澳门乜嘢都贵。你两千几蚊够唔够一个月使呀？只不过系帮补下啲消费，真系旨意𠮶两千几蚊，死得啦。澳门乜嘢都贵。」

文女士观察到，自从政府派发医疗券、消费券之后，物价、睇医生费用连年上涨，但少见回落：「屋企对面医生加到而家300几蚊一次。……自从有咗啲咩金咩金、消费卡、医疗券，啲物价就贵咗好多啦。医疗券得𠮶600蚊，你一年都唔会睇2次医生咁少啦。」

提到最近进行的「大奖赏」，她表示只抽到10蚊、20蚊，「冇用㗎，帮助唔到。」若抽到大面额，更要消费更多，「你惨呀，𠮶个礼拜畀你抽到200蚊，仲死，要买600蚊嘢，突然间，系咪先，畀你抽到300蚊仲死，要买900蚊嘢，一个礼拜，900蚊买咩呀你话？」

物价高企，楼价亦高企。文女士指虽然自己没有住屋压力，但眼见年轻一辈「惨」，难买楼上车，「首期都要畀百几万，供都供唔起啦，一个月供万几蚊，而家啲收入咁低。」

她留意到网上有言论指现金分享应加条件，规定常居澳门才能获派，文女士亦认同。「好多人系揸咗澳门身份证，但冇喺澳门住嘅，又冇纳税，又冇乜嘢。……我哋做嘢做几十年，纳咗咁多年税，我哋正式系澳门人，享受返澳门人福利系应该㗎嘛。但系政府思唔思考，唔关我事。」

氹仔居民：育儿津贴系「惊喜」　
未打动再生多个

傍晚时分，氹仔居民潘小姐刚好接小朋友放学路过。她表示自己很少关心施政报告内容，「冇乜太紧张呢方面，有少少随遇而安，肉随砧板上，又觉得冇咩所谓，就算有咩政纲又好咩都好，都好似自己又唔会改变到啲乜嘢。」若到政策真的出现「太离谱」的事才会再多留意，可能也会多了澳门人的声音出来阻止。

潘小姐从身边人讨论之中留意到今年施政。「感觉上都OK啦。」认为新增的每月1,500元育儿津贴有惊喜：「如果自己小朋友喺𠮶个period入边有钱拎，都会兴奋。但又未至于觉得因为有呢旧钱，但本来冇决定生嘅时候改变咗想生。」

她表示，津贴额度「系唔少钱」，但未打动自己想生多个，「又唔会一直派，3岁后要靠自己，钱又唔会用得少咗」。措施有利于本来就有生育计划的家庭，或可帮补奶粉钱、尿片钱。

氹仔居民：讲出嚟要做得到先有用

记者遇到正在陪同小朋友玩耍的陈先生。已退休的陈先生称自己有了解今年的施政报告，对长者养老金增加较多留意，但认为比对其他地区，养老金仍是过低。「我哋都系关心啲福利，有所升都系好事，现金分享、育儿、医疗各方面……事实系比之前好少少，又唔系好好多。都OK啦。」

他又指，新任特首才上任不久，总要有个过程，施政报告内容都可以接受。「同左邻右舍相比，（福利）都比较好，做人要知足。」但强调「讲嘅嘢到时要兑现」。「施政讲出嚟要做得到先有用。你都知啦，贺一诚在任讲讲讲，讲完就走人都冇实现，而家到佢啦，唔好佢讲完又话走人。」

陈先生关注长者福利应再提升，对比内地，本澳养老金金额仍落后一大截，而物价贵，长者若无积蓄、也无子女帮补，则很难生活，「单纯靠退休金喺澳门好难挨……你知道有啲人六七十、七八十岁还要做工，无计，靠退休金系顶唔住。」

此外，在本地医疗保障也不完善。陈先生提到，本地医疗「做个检查还要排死你，等个报告等成十日八日，远远比唔上大陆，人哋一去到住院，报销八九成，起码检查什么速度快好多」。除了公共医疗，整个政府的办事效率也应提升，例如办证件，但现时已好过以前好多。

他亦留意到横琴单牌车北上等新措施，亦建议周末「澳车北上」开更多名额。