【A&M Diary】唔知你哋有冇玩过情侣Bingo游戏呢？例如问题系对方钟意咩颜色，然后一齐讲个答案出嚟，睇吓答得啱唔啱，就知道有几了解对方啦！如果讲中式小菜Bingo，A姐最钟意一定系肉饼！所以食亲饭，肉饼总是常出现，咁如果成间餐厅都只系得肉饼，唔知A姐又会唔会好兴奋呢！今日我哋去到元朗嘅屏山老地方，呢间舖头超过50款肉饼选择，A姐话连续食50日都唔会厌。

屏山老地方邻近西铁天水围站或轻铁屏山站，另外，餐厅更加提供免费泊车，方便驾驶人士。食饱饱之后，仲可以去旁边嘅屏山文物径开展一场历史漫步之旅。

黑椒牛肉煎肉饼饭
餐厅嘅肉饼选择超过50款，有啲惊喜十足，有一啲我就觉得似系伏，但对于肉饼狂迷嘅A姐就认为每一款都系充满创意力量同幻想。佢就拣咗黑椒牛肉煎肉饼，本身以为黑椒只系淋上面嘅酱汁，估唔到系将黑椒同牛肉完美咁融入肉饼内，黑椒味香浓，煎完嘅肉饼够厚实又Juicy，啱晒钟意啖啖肉嘅佢。

咸鱼莲藕煎肉饼饭
至于我就拣咗同肉饼最夹嘅咸鱼，加埋莲藕喺入面，口感一流。而且咸鱼绝对冇得输，咸香味十足又冇骨，煎完之后够香脆，估唔到我都比肉饼深深吸引住。另外，呢度嘅肉饼成只手掌咁大，真系𩠌多过饭，够晒抵食！

新疆土乡鸡翼
鸡翼新鲜炸香，够晒脆卜卜同热辣辣，面头铺上大量嘅孜然粉，味道好有层次，但就略嫌孜然粉太多。